“ စိတ်မကောက်တတ်တဲ့ ပါးချိုင့်လေး ”

ပွင့်အံ့နိုးနိုးနဲ့
ကိုယ် ခိုးပြီး စောင့်နေတဲ့ ပါးချိုင့်လေးရေ
ကမ္ဘာရဲ့ ဟိုဘက်ခြမ်း ဒီဘက်ခြမ်း
မင်းအပြုံးတစ်ချက်ကို ကိုယ် လွမ်းတတ်နေပြီ

မဖြစ်နိုင်မှန်း သိသိကြီးနဲ့
ချစ်သူ့ အသံလေးကို ဝှက်ထားဆဲ
ကိုယ့် ကိုယ်ရံတော် အတ္တတွေ
စိတ်မကောက်တတ်တဲ့ ရယ်သံတစ်ပွင့်ထဲ ပြုတ်ကျ
ကြည်နူးမှုဟာ လှလှပပ မွေးဖွားခဲ့ပေါ့

လူပြောသူပြောများနေတဲ့ ပန်းသီးလေး တစ်ကိုက် ထက်
သဝန်တိုသံ စိတ်မချသံလေးတွေကိုပဲ ကိုယ် ဆာတာပေါ့
ရန်မိုး တဖြိုက်ဖြိုက်မှာ ပူအိုက်နေရှာမဲ့ နှုတ်ခမ်းလေးအတွက်ပဲ
ပန်းသွေးရောင်လေး လျော့ရဲသွားမှာ စိုးရိမ်တယ်

စကားလုံးပုံတူလေး ကင်းဗတ်စ်ပေါ် ဖြန့်ဖြန့်ပြီး
သူ့ အကြည့်တစ်ဝက်ကို ကိုယ် လွမ်းငေးရေးဆွဲ
အလင်းနဲ့ အမှောင်ကို မျက်ခုံးပေါ် တင်ကြည့်တော့
ကိုယ့် မီးတောက် ဆည်းဆာလေး ဖျားသွားတယ်

တကယ်တော့ ချစ်သူက
အများသူငါထက် မပိုတဲ့ ကောင်မလေး တစ်ယောက်
ကိုယ့် နံရိုးနဲ့ ယက်ဖောက်တဲ့ နတ်ဖုရားရုပ်လေးဖြစ်နေတာကလွဲလို့

ရင်ဘတ်ထဲက နာရီစင်လေးက သူမပေါ့
သူမကို ကြည့်ပြီး မင်္ဂလာ နံနက်ခင်းပါလို့ ကိုယ် နှုတ်ဆက်တယ်
ကောင်းသောညပါလို့ သူမကို နှုတ်ဆက်ပြီး ကိုယ် အိပ်ရာဝင်တယ်
ကိုယ့်တစ်နေ့တာဟာ ရိုးရိုးရှင်းရှင်းနဲ့ ပြည့်စုံလွန်းခဲ့ပြီ

ချီရွန် ( ပုလဲ )