Comment #1

တရားသခင်

ကြည်လင်ရုပ်သွင်၊ သခင်လာသည်ကို
ကြည်ညိုမြတ်နိုး၊ ကျွန်ရှိခိုးဆဲ
မာန်ငြိုးကင်းစင်၊ ဆုထူးမြင်ဆဲ
သင်မိစ္ဆာလား၊ သမာလား
မေးအားရက်လှသည်။

ကြည်လင်ရုပ်သွင်၊ သခင်ဟူသည်
တဆူဂင်္ဂါသဲမှ၊ ရှင်ဗုဒ္ဓလား
ထမြောက်ပြန်သစ်၊ ခရစ်တော်လား
ကျော်လွင့်လူ့ရွာ၊ အလ္လာဟုလား
စကားမွန်မြတ်၊ ကွန်ဖြူးရှပ်လား
ကားလ်မတ်၊ အိန်ဂျယ်
လယ်နင်၊ စတာလင်လား။

ကြည်လင်ရုပ်သွင်
သခင်မွန်ကို၊ ကျွန်ရှိခိုးလည်း
လူကို ရှိမခိုး၊ တရားကို ရှိခိုး၏
စိုးစဉ်းချွတ်ယွင်း၊ ခေတ်နှင့်မလျင်းက
ခြွင်းချက်ဖြင့် ပူဇော်၏။

ကြည်လင်ရုပ်သွင်၊ သခင်တို့သည်
သူမှီတင်းသော၊ လူ့ခေတ်ပြောကျယ်
လိုက်လျောကျင့်ဝတ်၊ ပညတ်မြဲရှင့်။
ဖြူဖြောင့်ချစ်တတ်၊ အပြစ်ခွင့်လွတ်
နားလည်ညွှတ်ပျောင်း
လွတ်မြောက်ကင်းလျက်
အသက်လှူရက်၊ ဆင်းရဲဖက်ခဲ့
ကိုယ်ပျက်ငြူစူ၊ နူသူကိုပင်
ကြည်ဖြူလက်ကမ်း၊ ဖက်ယမ်းပေါင်းသင်း
သနားခြင်းဖြင့်၊ တရားမင်းဟု
စစ်မှန်ခြင်းတည်ရာ၊ သခင်လာသည်
နာမည်မရှိ၊ အသိဝေငှ
အလှတရားမျှဖြစ်၏။ (ကြည်အေး)
ရှုမဝ၊ ၁၉၇၁၊ ဇန်နဝါရီ

ကူးတင်သူတွေက တဆူဂင်္ဂါသဲမှကို စသတ်ထားကြတယ်။ မလုပ်ကောင်းပါ။ ကိုယ်တတ်ရင် ကိုယ့်ကဗျာမှာ ကိုယ့်သတ်ပုံနဲပ ရေးပေါ။ ကြည်အေးကို နာမည်မဖျက်သင့်ကြပါ။ မကြာမီမှာ တရားသခင်၊ တရားမင်းကိုပါ စသတ်လာကြလိမ့်မယ်။

ဒေါက်တာတင့်ဆွေ

By: [email protected] at Sep 10, 2021