တစ်ကိုယ်လုံးမှာ tattoo ရာအပြည့်နဲ့ အဝတ်စုတ်တစ်ခုရဲ့အတွေးက ခပ်တိမ်တိမ်ပဲ

ရိုးသားမှုကိုငါးမျှားချိတ်မှာတပ်ပြီးပစ်ချလိုက်တာ အတ္တတစ်ခုပဲဖမ်းမိသွားတယ်

ကဲ ခင်ဗျားလိုနေတာ အရောင်ခပ်မွဲမွဲမျှော်လင့်ချက်အသစ်ကျပ်ချွတ်လေးဆိုရင်တော့

နောက်ပြန်လှည့်မကြည့်ပါနဲ့ . . လတ်တလော ဒါကအမှန်တရားတစ်ခုဖြစ်နေရင်လည်း

လူသားတွေအတွက် နာကျင်မှုဆိုတာ ဘုရားကပေးတဲ့ဆုလာဘ်တစ်ပါးပဲ

အရွယ်သုံးပါးမရွေး သုံးတက်တဲ့အပြုံးမျိုးကိုပဲ လောကကြီးက ဖောဖောသီသီထုတ်ပေးတာ

(ကျွန်တော်တို့) ကံကောင်းတယ်လို့ မှတ်ရမယ် . . နာကျင်လာရင်

အများကြီးပြုံးပါလို့ မိတ်ဆွေတစ်ယောက်ရဲ့ ပြောစကားမှာ ခွက်ထိုးခွက်လန်ပြုံးမိတယ်

လက်နဲ့ထိခတ်လိုက်တိုင်းစကားလုံးတွေကိုထတောက်စေတက်တာ ကျွန်တော်တို့/ခင်ဗျားတို့ ကဗျာဆရာတွေပဲ

ရယ်သံမှာနာကျင်သံတွေစွက်နေမယ်ဆိုရင် ဒါကိုငိုကြွေးခြင်းလို့ပဲ အဓိပ္ပာယ်ဖွင့်ထုတ်ချင်တယ်

cut လို့မအော်မချင်း ကျွန်တော်တို့ ဒီဖြစ်စဉ်ကြီးထဲက လွတ်ထွက်မသွားအောင်

ကိုက်ခဲမှုတွေနဲ့တုပ်နှောင်ခံထားရတယ် ။ ရုန်းကန်/ငြင်းဆန်ရင်းပဲ ဘဝတွေက အက်ကွဲထွက်ကုန်တယ်

အနူးညံ့ဆုံးတစ်ခါပြုံးပြီး ဘဝမှာနောက်ထပ်နာကျင်စရာမရှိတော့ဘူးလို့ တရားသေ

ဘယ်သူမှမထွက်ဆိုနိုင်ဘူး မဟုတ်လား ၊ tattoo တွေများလာလေလေ လှိုက်စားမှုတွေများလေလေပဲ

စိတ်ကဖြစ်ပြီး ခန္ဓာမှာပြတ်ထွက်မသွားဖို့ စိတ်ကိုစိတ်ချင်းပြန်တိုက်ပေးနေရတယ်

အရိုးသားဆုံးဝန်ခံရရင် လူရယ်လို့ဖြစ်လာကတည်းက ကျွန်တော်သစ္စာတရားကို

စူးစူးနစ်နစ်နာကျည်းမိတယ် ၊ မြှုံးမှာမိတဲ့ ငါးတစ်ကောင်ရဲ့ ကြေကွဲမှုမျိုးလောက်

ဝမ်းနည်းစရာကောင်းတာမရှိဘူး ။

မိငြိဏ်းခက်