အရိုးထဲစိုက်ဝင်လာမယ့် ဆူးချွန်ချွန်အမှောင်နေ့စွဲတွေကို
မြွေမကြောက် ကင်းမကြောက် နင်းဖြတ်နေရ
ကြွက်ကိုက်ခံထားရတဲ့ပေါင်မုန့်တစ်လုံး
ကြောင်အိမ်ထောင့်မှာ တိတ်တိတ်ဆိတ်ဆိတ် နာကျင်နေသလိုမျိုး
ရေဆုံးရေဖျား မနားမနေ ကူးခတ်ခဲ့တဲ့ငါးတစ်ကောင်
ရေကုန်ရေခမ်း ဖျပ်ဖျပ်လူး ဖျားသွေးဝင်နေတယ်

မိန်းမတစ်ယောက်ရဲ့ရင်အုံပေါ်
အလျှံညီးညီး တောက်လောင်ခဲ့ဖူးတဲ့ကျွန်တော့်စိတ်/အတိတ်ကို
ဘယ်လိုမှ လှီးထုတ်လို့ မရတော့ဘူး
ရက်လွန်နေတဲ့ဆေးဟာ ဘယ်ကုထုံးအတွက်မှ အသုံးမ၀င်

တစ်စက်ချင်းပျော်ကျနေရတာကို ကျွန်တော် မပျော်ဘူး
ကျွန်တော် ကုန်ချင်တယ်၊ ကျွန်တော် ခမ်းချင်တယ်
အမေပေးခဲ့တဲ့ ညီမလေးအတွက် မုန့်ဖိုး
ကျွန်တော့်လက်ထဲမှာ အငွေ့ပျံသွားခဲ့တယ်
ချစ်သူရဲ့မင်္ဂလာဆောင်မှာ
သတို့သားမျက်နှာ စိတ်ဓားနဲ့မွှန်းမိသူလို
ကိုယ့်မျက်နှာကိုယ် အက်ဆစ်နဲ့ ပက်ချင်တယ်

ကျွန်တော်ဟာ မိသားစုဆီ ရောက်လာတဲ့သွေးပျက်ဖွယ်ခြိမ်းခြောက်စာ
ကျွန်တော့်သွေးကြောတွေဟာ ရှော့(ခ်)ဖြစ်နေတဲ့ဝိုင်ယာကြိုးတွေလို တုန်ခါ
ကျွန်တော့်ကို ထိတာနဲ့ ကျွန်တော်ဟာ ပေါက်ကွဲတော့မှာပဲ

ဆော့ခရတ္တိ(စ်) ကျွန်တော်အရွယ်တုန်းက မရေးနိုင်ခဲ့တဲ့ကဗျာ
အခု ကျွန်တော် ရေးနေတယ်
ဆော့ခရတ္တိ(စ်) ကျွန်တော့်အရွယ်တုန်းက မသောက်ခဲ့တဲ့အဆိပ်ခွက်
အခု ကျွန်တော် သောက်ချင်တယ်

                                                                            ကိုသျှား