ဦးနှောက်ပျက်တစ်လုံးဖြင့် ကမ္ဘာသစ်တစ်ခုပျိုးခြင်း

(၁)
တစ်သီးပုဂ္ဂလငါ့ကမ္ဘာက အဖော်မဲ့ တေးတွေနဲ့
တစ်ကိုယ်တော် နှာခေါင်းသွေးထွက်ခဲ့ရတာများပြီ
 
(၂)
အဖြူတစ်ဝက် အနက်တစ်ဝက်
ဖောက်လွှဲဖောက်ပြန် ကောင်းကင်အောက်မှာ
အရူးလင်လုပ်ရသလို မိုးစက်တွေနဲ့
အဲဒီနေ့က ဟန်မဆောင်နိုင်တဲ့ အမှန်တရားကိုရှာတွေ့တယ်
 
(၃)
ငါဆိုတာ ရင်ဘတ်မှာလွမ်းဒဏ် သင့်
ဦးနှောက်ထိအောင် လှိုက်တက်လို့ စိတ္တဇ ကျိန်စာနဲ့
စုန်းပူးသလို ရူးနေတဲ့ကောင်
 
(၄)
ဘယ်လိုများမျက်စိလည်လမ်းမှားခဲ့ ပါလိမ့်
ဘယ်လိုများရည်ရွယ်ခဲ့ပါလိမ့်
လကွယ်ညမှာ လင်းလက်ခဲ့ရလို့
ဝါးလုံးခေါင်းထဲလသာတယ်လို့တော့မ ပြောပါနဲ့
 
(၅)
ချစ်တယ် ဆိုတဲ့စကားတစ်ခွန်းထက် လေးနက်မှုကို
တရှိုက်မက်မက်ဆွဲဖွင့်ပြီးတဲ့နောက်မှာ
နှုတ်ခမ်းတွေနွေးထွေးသွားတယ်
ပြီးတော့အေးစက်သွားတယ်
အသွေးအသားတွေ နွေးထွေးသွားတယ်
ပြီးတော့ အေးခဲသွားတယ် ။
 
(၆)
အလွမ်းနေ့ည တွေဘယ်ပုံဘယ်နည်းကုန်ဆုံးခဲ့ရသလဲ
တစ်ပိုင်တစ်နိုင် မုသာဝါဒတွေ ဘယ်ပုံဘယ်နည်းပျောက်ရှခဲ့ရသလဲ
အဓိပ္ပါယ်မရှိတဲ့ အပေါစားအိပ်ချိန်တွေတိုင်း
အိပ်မက်လှလှတွေ မက်ခွင့်ပေးတဲ့အတွက်
ဖော်မပြနိုင်လောက်အောင် ကျေးဇူးတင်တယ် ။
 
(၇)
ငါ့လက်ကိုဆုပ်ကိုင်ပါ
ငါ့ခြေထောက်တွေကို ထိန်းချုပ်ပါ
ငါ့ရဲ့အသိဥာဏ်တွေအားလုံးမင်းအပေါ်မှာရှိပါစေ။
 
(၈)
“နင်ပြန်တာငါ ကြည့်နေချင်လို့ပါ”
ဒီစကားက ငါ့နားထဲကို
တစ်ဖက်ကငှက်မွှေးလေးလိုနူးနူးညံ့ညံ့
တစ်ဖက်ကဓါးတစ်ချောင်းဝင်သွားသလို
ကြည်နူးခြင်းတစ်ဝက် ၀မ်းနည်းခြင်းတစ်ဝက်
အတိတ်က ငါ့ကိုခြောက်လို့
ကြက်သီးဖြန်းဖြန်းထတယ် ။     
အိပ်ကပ်ထဲက မျက်ရည်တွေရွှဲနေတဲ့ ဓာတ်ပုံတစ်ပုံ
လွှင့်ပစ်ရမလား ဆက်သိမ်းရမလားပြောဦး ။
 
(၉)
အတိတ်ဆိုတာ တို့နှစ်ယောက်နွေးထွေးမှုကို
ပူလောင်စေတယ် ။
အနာဂတ်ကိုမျှော်လိုက်ရင် ပစ္စုပ္ပန်ရဲ့ အပြုံးတွေ
ပျောက်ဆုံးသွားမယ် ။
အိပ်မက်တွေမအေးစက်စေနဲ့
အကြင်နာနွေးနွေးလေးတွေနဲ့
တို့ကမ္ဘာကိုချဲ့ထွင်ပါ ။
 
(၁၀)
ဒါ အိပ်မက်မဟုတ်ကြောင်း သက်သေပြဖို့
မနေ့ညက ငါမအိပ်ခဲ့ဘူး ။

နတ်ခတ်ဆူး
29/8/2011