“နေရာပေး၏ မပေး၏”

မနေ့ကအလုပ်ကပြန်ရောက်တော့ ဖိတ်စာလေးတစ်စောင်ခုံပေါ်မှာတွေ့ရပါတယ်။

ကောက်ဖတ်ကြည့်လိုက်တော့ နှစ်ပေါင်းများစွာ အဆက်အသွယ်ပြတ်သွားကြတဲ့ ဆွေမျုိးအိမ်က အလှူဖိတ်စာလေးဖြစ်နေတာကိုတွေ့ရပါတယ်။

နောက်စာတိုလေးတစ်ကြောင်း။

“အကိုလေးရေ.. လူကြီးတွေလက်ထက်ကဖြစ်ခဲ့တာ ကျနော်တို့လက်ထက်မှာသင်ပုန်းချေလိုက်ရအောင်နော်”

လို့ဝိုင်းစက်လှပတဲ့လက်ရေးလေးကိုဖတ်လိုက်ရပါတယ်။

ရေးတဲ့သူကတော့ကျနော့်ညီမ၀မ်းကွဲ “အေးအေးမြင့်”

 အိမ်နောက်ဖေးကထွက်လာတဲ့ မဒမ်ပေါက်က

နေ့လည်က” မိအေးကိုယ်တိုင်လာပေးသွားတာ လာမယ့်ဥပုဒ်နေ့

အကိုလေးလာဖြစ်အောင်လာပါလို့လဲ ပြောသွားသေးတယ်”လို့ သတင်းပေးပါတယ်။

ကျနော်လဲ အိမ်ထဲဝင် အ၀တ်အစားလဲပြီး  ပက်လက်ကုလားထိုင်ပေါ်မှာထိုင်မိမှ

မိအေးရေးသွားတဲ့စာလေးကနေအစပြုပြီး အရင်ဖြစ်ခဲ့တဲ့အကြောင်းတွေကို ပြန်စဉ်းစားမိပါတယ်။

 @@@@@@@@@@@  @@@@@@@@@@@@@@ @@@@@@@@@@@@@@@@@@@@

 

အတိတ်ဆိုတာ အကောင်အထည်မပြနိုင်ပေမယ့် မေ့ပျောက်လို့ မေ့ဖျောက်လို့မရစကောင်းတာလဲအမှန်။

လွန်ခဲ့သောနှစ်ပေါင်းလေးဆယ်လောက်ကဘဲဆိုပါစို့။

မိအေးတို့ အဖွား နဲ့ ကျနော့် အဖွားက အထက်အောက်ညီအမ။

အဖွားက အကြီး မိအေးတို့အဖွားက အငယ်။

မိအေးနဲ့ကျနော်ကျပြန်တော့လဲ ကျနော်က 2နှစ်ကြီးတယ်။

သူ့အကိုက ကျနော်ထက် 2နှစ်ကြီးတော့ သူ့အကိုက ကိုကိုကြီး ကျနော်က ကိုကိုလေး အလိုလိုဖြစ်သွားပါတယ်။

တစ်နှစ်မှာ မိအေးတို့ အဖွားက သူ့မြေးတွေကို အလှူကြီးလုပ်ပေးပါတယ်။

ကျနော်ကို သူတို့အလှူမှာထည့်ပြီး လှူဘို့ပြောတော့ ကျနော့်အဖွားကလက်မခံပါဘူး။

အဲဒီအချိန်မှတ်မှတ်ရရ အမေ့ဖက်က အဖွားတို့ အဖိုးတို့က စီးပွားရေးအဆင်မပြေဖြစ်နေတဲ့အချိန်၊

အဲတော့ သူများအလှူထဲမှာကိုယ့်မြေးကို  ရောကောသောကောနဲ့ မလုပ်ချင်လို့ မထည့်တာလဲဖြစ်နိုင်သလို

နောက်အဖွားကိုယ်တိုင်ကလဲ ကျနော်တို့ကို ရှင်ပြုပေးမယ်လို့ ဆုံးဖြတ်ချက်ချထားတာကြောင့်လဲပါ ပါမယ်။

မန်းလေးထုံးစံအတိုင်းအလှူမတိုင်ခင်ကတည်းက မောင်ရှင်လောင်းအတွက်အကျီတွေသွားငှားကြ

သင်္ကန်းတောင်းတွေကျက်ကြ နဲ့ တစ်ပျော်တစ်ပါးကြီးပါဘဲ။

ဒါနဲ့ဘဲ အလှူမှာပါတဲ့ ညီအကိုမောင်နှမတတွေ တရုန်းရုန်း တပြုံးပြုံးနဲ့သွားကြလာကြ

 ၀တ်ကြစားကြတာကို ပါဝင်ခွင့်မရတဲ့ ကျနော့်မှာငေးကြည့်နေရတာပေါ့။

အဖွားရဲ့ ညီမကလဲ သူ့အလှူထဲကို ကျနော့် မထည့်လို့ အဖွားကိုသိပ်တော့ အစာမကြေပါဘူး။

သူကလဲ မောင်နှမအားလုံး တစ်စုတစ်ဝေးကြီး အလှူထဲမှာပါစေချင်ပုံရပါတယ်။

 

ဒီလိုနဲ့ဘဲ အလှူနေ့ရောက်လာပါတယ်။

ကျနော်တို့ အိမ်နဲ့သိပ်မဝေးတဲ့ ဘုန်းကြီးကျောင်းထဲမှာလုပ်တာပါ။

တကယ့်ကို တပျော်တပါးကြီးပါဘဲ။

မောင်ရင်လောင်းတွေ ကို ဆံချခါနီးတော့ ထမင်းကျွေးတဲ့အချိန်မှာမှာ ပြဿနာတက်တော့တာပါဘဲ။

ခဏနေရင် ဆံချတော့ မယ့် မောင်ရင်လောင်းတွေကို ထမင်းကျွေူးပါတယ်။

အဲဒီအချိန်ကျနော်ကလဲ သူတို့နဲ့ရောပြီးထမင်းစားဘို့ဝိုင်းထဲဝင်လိုက်ပါတယ်။

ဖြစ်ချင်တော့ မောင်ရင်လောင်းတွေက များတော့ ထမင်းဝိုင်းက မဆန့်ဘူးဖြစ်နေပါလေရော။

မိအေးတို့အမေက ကျနော်ကို

“နင်နောက်မှစားလိုက် မောင်ရင်လောင်းတွေက အရေးကြီးတာ။

သိပ်စားချင်နေရင်လဲ ဒီနားမှာမစားနဲ့ ဟိုဘက်သွားစား”

လို့ပြောလိုက်တော့ ကျနော်လဲ အဲဒီထမင်းဝိုင်းထဲက ထွက်လိုက်ရပါတယ်။

အဲလိုပြောတဲ့ အချိန်မှာမိအေးတို့အမေ လေသံက နည်းနည်းလေးတော့ မာသလိုလိုရှိပါတယ်။

မိအေးပြောတာကို ကြားသွားတဲ့ အမေကြီးက ကျနော့်လက်ကို ခပ်ကြမ်းကြမ်းဆောင့်ဆွဲပြီး

“လာ ပြန်မယ်” ဆိုပြီးဘုန်းကြီးကျောင်းထဲက နေထွက်လာခဲ့ကြပါတယ်။

အဲဒီနေ့ကစပြီး အဖွားနဲ့သူ့ညီမတို့  အိမ် လုံးဝကို အဆက်အဆံမရှိကြတော့တာ

သူတို့တစ်တွေ အသီးသီးကွယ်လွန်သွားတဲ့အထိပါဘဲ။

လူကြီးတွေကိုယ်တိုင် အဆက်အဆံမရှိဘူးဆိုတော့

ကျနော်တို့လူငယ်တွေကလဲဖာသိဘာသာ နေလိုက်ကြပါတယ်။

ဒီတော့လဲ ဆွေခန်းမျိုးခန်းပြတ်သလိုဖြစ်သွားပါတော့တယ်။

မိအေးတို့ကျနော်တို့က လမ်းတွေ့နုတ်ဆက် အခေါ်အပြောပြန်ရှိပေမယ့် သာရေးနာရေး ကတော့

တစ်ယောက်နဲ့တစ်ယောက် ဖိတ်တယ်ပြုတယ်မရှိကြတော့ပါဘူး။

အခုမှသာ မိအေးက ဘယ်လိုစိတ်ကူးပေါက်သွားလို့ပြန်ဆက်တယ်မသိပါဘူး။

&&&&&&&&&& &&&&&&&&&&&&&&& &&&&&&&&&&&&&&&&& &&&&&&&&&&&&& &&&&&

ကျနော်ဆယ်တန်းအောင်ပြီးတော့ အစိုးရအလုပ်ထဲကို ငယ်ငယ်ရွယ်ရွယ်နဲ့ရောက်သွားပါတယ်။

ကျနော်အလုပ်လုပ်ရတဲ့စက်ရုံက လူကြီးများ အာရုံမရှိတဲ့ မျက့်စေ့မကျတဲ့စက်ရုံဖြစ်နေတော့

ဘာလေးဘဲဖြစ်ဖြစ်သူများ ရဲ့ နောက်မှာပါဘဲ။

အဲဒီခေတ်က လူကြီးမျက်စေ့ကျတယ်ဆိုတဲ့  နေရာတွေက  လုပ်ငန်းအောင်မြင်တယ် ၀င်ငွေကောင်းတယ်ဆိုတဲ့

စက်ရုံတွေ ဌာနေတွေပါဘဲ။

အဲတော့ရုံးသုံးဘို့ပေးထားတဲ့ကားတွေက သူများမလိုချင်တဲ့ကားခပ်စုတ်စုတ်တွေပေါ့။

ကျနော်တို့စက်ရုံက မြို့ရဲ့ အနောက်ဖက်ဆုံးမြစ်ဆိပ်နားမှာ။

ဈေးသွားဝယ်မယ် အလုပ်ကိစ္စနဲ့ရုံးတွေကိုသွားမယ် သမ၀ါယမကပေးတဲ့ပစ္စည်းတွေသွားထုတ်မယ်

ဆိုတဲ့ကိစ္စတွေရှိလို့ မြို့ထဲသွားမယ်ဆိုရင်

 တစ်ပြလောက်သွားပြီးရင် ထိုးထိုးရပ်တတ်လို့ စီးသူတိုင်းဆင်းတွန်းမှဆက်သွားတတ်တဲ့

ရှေးချက်ဗလက်ကားကြီးကို တွန်းစီး  စီးချင်ရင်စီး ။

ဒါမှမဟုတ်ရင် ရှေ့ခေါင်းကလွဲရင် နောက်က ဘော်ဒီတစ်ခုလုံး ပုခက်လွဲသလိုလှုပ်နေတတ်တတဲ့

“ကားပုခက်”အီး2000ကို စီးချင်စီးပေါ့။

ရွေးစရာကားက ဒီနှစ်စီးပါဘဲ။

ဒီတော့လဲ နှစ်စီးထဲက တွန်းစရာမလိုတဲ့ ကားပုခက်ကိုဘဲသုံးကြပါတော့တယ်။

“ကားပုခက်”ကိုစီးမယ်ဆိုရင် ရှေ့ခန်းကို ရအောင်ဦးကြပါတယ်။

ဒါမှ အလှုပ်သက်သာတာကိုး။

တစ်ရက်တော့ စီကျူက အပျိုကြီး မကြည်ကြည်ဝင်း ကလဲ မြို့ထဲသွားမယ်။

ရုံးပေါ်က ငွေစာရင်းက မမြမြ၀င်းကလဲ ဘဏ်သွားပြီး လစာတွေထုတ်မယ်။

စီမံကဒေါ်ခင်ရ်ီကလဲ ဈေးထဲမှာ ရုံးသုံးစာအုပ်တွေအ၀ယ်ထွက်မယ်ဆိုတော့

မင်းသုံးပါးဆုံနေပါတယ်။

သွားမယ်လဲလုပ်ရော ထုံးစံအတိုင်းရှေ့ခန်းစီးနိုင်ဘို့နေရာဦးတော့တာပေါ့။

ဖြစ်ချင်တော့သွားခါနီးမှ မမြမြ၀င်းအတွက်ဖုန်းလာတော့ ရုံးထဲတစ်ခါပြန်ဝင်ရပါတယ်။

ဒေါ်ခင်ရီ က လူကြီးဆိုတော့ အော်တော်မက်တစ်ရှေ့ခန်းပေါ့။

မကြည်ကြည်ဝင်းက စောရောက်တော့ ရှေ့ခန်းမှာထိုင်နှင့်ပါတယ်။

ကားကလဲ မောင်းတဲ့သူနဲ့ဆိုမှ သုံးယောက်ထက်ပိုထိုင်လို့မရ။

အဲဒီမှာ မကြည်ကြည်ဝင်းကလဲဖယ်မပေးတော့ မမြမြ၀င်းက မလိုက်ဘူးဆိုနေခဲ့ပါတယ်။

နောက်တော့ မိန်းမတွေထုံးစံအတိုင်း ဗျောက်ဖောက်တော့ တာပေါ့။

သူများသွားမယ်ဆိုမှ ဇွတ်လိုက်တယ်ပေါ့။

ဟိုဘက်ကလဲ ဒီလိုမှန်းမသိရင်မလိုက်ပါဘူး ကားဆရာကိုအောင်မောင်းက မြို့ထဲသွားမယ်ဆိုလို့

ကြုံတာနဲ့လိုက်တာပေါ့။

နောက်ဆုံးတော့ ကားဆရာကိုအောင်မောင်း ကဘဲ အပျိုကြီးကို ဇွတ်နေရာပေးသလိုအပြောခံရပါတယ်။

ဇာတ်သိမ်းခန်းကတော့ အရင်က အတော်လေးတည့်တဲ့ ကြီးကြီးဝင်နဲ့များများဝင် လို့နာမည်ပြောင်ပေးထားတဲ့ သူငယ်ချင်းနှစ်ယောက်ခပ်တန်းတန်းဖြစ်သွားတာပါဘဲ။

$$$$$$$$$$$$$$$$$$$$$ $$$$$$$$$$$$$$$$$$$$ $$$$$$$$$$$$$$$$$$ $$$$$$$$$$$$$$$$$

ဒီကားရှေခန်းကိုလုထိုင်တဲ့အကြောင်းလေးတွေးမိတော့ ကျနော်မိတ်ဆွေအယ်ဒီတာတစ်ယောက်ပြောတာကို

သွားသတိရမိပါတယ်။

လွန်ခဲ့ ထဲ့ နှစ်လလောက်က သူတို့စာပေသမားတွေ အဖွဲ့လိုက်ကြီးခရီးအတူသွားပါသတဲ့။

အဲဒီမှာ နာမယ်ရသော မရသော စာပေ၀ါကြီးသော နုသော

အသက်ငယ်သောကြီးသော အောင်မြင်နေသော မအောင်မြင်သော

ဆရာ့ဆရာကြီးများအစုံပါ ပါသတဲ့။

အဲဒီအထဲမှာ လက်ရှိအောင်မြင်တက်ကြွနေတဲ့ လူလတ်ပိုင်းစာရေးဆရာလဲပါ ပါသတဲ့။

လူအများကြီးသွားကြတော့ ကားကလဲကားအကောင်းတွေလဲပါ ခပ်လတ်လတ်လဲပါပေါ့။

အဲ တစ်နေရာရာကိုသွားတော့မယ်ဆိုရင် အဲဒီအောင်မြင်တက်ကြွနေတဲ့ဆရာက

အကောင်းဆုံးကားရှေ့ခန်းမှာ ဖျပ်ကနဲနေရာယူပြီးသာဖြစ်နေတတ်ပါသတဲ့။

အစကတော့ ဘယ်သူမှသတိမထားမိပေမယ့် သွားတဲ့ရက်ကြာလေလေ သူနေရာယူတာကပေါ်လွင်လေ

ဆိုတာအများမေးငေါ့စရာ ဖြစ်သပေါ့နော်။

######### ################## ############### ###########

နောက်တစ်ခါက တော့ မင်္ဂလာဆောင်တစ်ခုမှာဖြစ်တာပါ။

သူငယ်ချင်း “ခင်စန်းလွင် “ရဲ့သားမင်္ဂလာဆောင်တော့ အားလုံးက ၀ိုင်းကူကြရတာပေါ့။

သားဦးလဲဖြစ် တော့ သတို့သားအမေက လဲ ဧည့်ခံတဲ့နေရာမှာ လိုမှာပြုမှာစိုးတော့

သူငယ်ချင်းတွေကို ၀ိုင်းကူဘို့မှာတာပေါ့။

သူပိုစိတ်ပူတာက မင်္ဂလာဆောင်နေတဲ့အချိန် မုန့်တို့ ရေခဲမုန့်တို့မလောက်မငှဖြစ်မှာကို ပိုစိတ်ပူပါတယ်။

နောက် သူများတွေပြောတာက မင်္ဂလာဆောင်မှာစိတ်အပူရဆုံးနေရာက မုန့်ပြင်တဲ့နေရာ၊

မကြည့်နိုင်ရင် မုန့်တွေပစ်စလက်ခတ်ဖြစ်အောင်လုပ်တာတို့ အိမ်သယ်တာတို့ လုပ်တတ်တယ်။

 အဲဒီနေရာမှာကိုယ့်စိတ်ချရတဲ့လူထားဘို့အကြံပေး ကြပါသတဲ့။

အဲဒါနဲ့သူကလဲ သူငယ်ချင်းတွေထဲက သွက်သွက်လက်လက် ပြောရဲဆိုရဲရှိတယ်” မထား “ကို

အကူအညီတောင်းလို့  သေချာကြည့်ပေးဘို့မှာတော့ မထားကလဲ စိတ်ချပါပေါ့။

အဲဒီနေ့မနက် “မထား”ကလဲ အားလုံးနဲ့အတူမလိုက်ဘဲ မနက် ခြောက်နာရီခွဲလောက်ကတည်းက

ရောက်ပြီး အားလုံးကိုနေရာတကျဖြစ်အောင်စီစဉ်။

သူ့အလုပ်ဆိုင်က တပည့်လေးနှစ်ယောက်ကိုပါခေါ်လာပြီး မုန့်ပြင်တဲ့နားမှာထားပါသတဲ့။

တကယ်မင်္ဂလာဧည့်ခံတဲ့အချိန်ရောက်တော့ ဧည့်ကျလာတော့  “မထား” လဲ ၀င်ဧည့်ခံပါသတဲ့။

ဖြစ်ချင်တော့ သူတို့ငယ်သူငယ်ချင်းတွေ တစ်ဝိုင်းထဲစုမိတဲ့အချိန့် “မထား” ပါဝင်ထိုင်ပြီးစကားတွေ

ပြောမိတာပေါ့။

အဲဒါကို မြင်သွားတဲ့ ခင်စန်းလွင်က

“မထားရယ်ငါကညည်းကို မုန့်ပြင်တဲ့နေရာ နေခိုင်းတာ ညည်းက ဒီမှာလာ လေပေါနေတယ်”

လို့စိတ်တိုတဲ့လေသံနဲ့ပြောလိုက်ိတော့ မထားလဲ ထသွားပါသတဲ့၊

မင်္ဂလာဆောင်ပြီးလို့ ညမှာ ဧည့်ခံပွဲလုပ်တဲ့ အချိန် မထား ကိုမမြင်တော့ ခင်စန်းလွင်က သူငယ်ချင်းတွေကို

မေးတော့ မှ “လာမှာ မဟုတ်ဘူး မနက်က မင်္ဂလာဆောင်ပြီးတော့ ငါ့အိမ်လာပြီး ငိုချင်းချသွားတယ်။

သူငယ်ချင်းချင်းအတူတူ သူများကိုတော့ ကျော့ကျော့လေးဧည့်ခံခိုင်းပြီး သူ့ကျမှ နောက်ဘေးချောင်မှာ

သူခိုးစောင့်ခိုင်းထားတယ်လို့လာပြောသွားတယ်”လို့ မနွယ်က ဇာတ်ကြောင်းပြန်ပါတယ်။

############ $$$$$$$$$$$$$$$$$ ^^^^^^^^^^^^^ $$$$$$$$$$$$$$$$$$

ဒါကတော့ ခေတ္တခဏလေး နေရတဲ့ နေရာနဲ့ပါတ်သက်လို့ အမှတ်ရစရာလေးတွေပေါ့။

ဟိုတစ်ရက်က ဆရာမကြီးနဲ့ ဒီနေရာလေးတွေအကြောင်းပြောဖြစ်ကြပါတယ်။

ဆရာမကြီးက မြန်မာနိုင်ငံအပြင်ထွက်လို့ ပညာလဲသင်ဘူးပါတယ်။

သူပြောပြတာလေးက တော့

“ဆရာမကြီးတို့ ဟိုမှခဏနေတုန်းကတော့ ဒီလိုဧည့်ခံပွဲမျုိးဆိုရင် စားစရာသောက်စရာလေးကို

လက်ထဲကိုင်၊ဟိုဟိုဒီဒီလျောက်သွားရင်း စကားပြောကြတာဘဲ။

အုပ်စုဖွဲ့ပြီးထိုင်နေတာတွေ့ရင်ကြည့်လိုက် ဆရာမကြီးတို့ အာရှကလူတွေဘဲ”လို့ပြောပါတယ်။

အဲတော့ ရှေ့မှာထားတယ် နောက်မှထိုင်ရတယ်ဆိုတဲ့ ပြဿနာမရှိတော့ဘူးပေါ့နော်။

နောက်အခု မြန်မာပြည်ကခေတ်နဲ့တပြေးညီတိုးတက်လာတော့ နိုင်ငံခြားရုပ်ရှင်တွေလဲ

ကြည့်လာရပါတယ်။

အဲဒီရုပ်ရှင်တွေထဲမှာ သူဌေးတို့ ပိုင်ရှင်တို့မော်တော်ကားစီးရင် နောက်ခန်းက ခပ်ခန့်ခန့်ကြီး

ထိုင်လိုက်သွားတာတွေကို တွေ့နေရပါရော။

ဒီမှာကတော့ ပြောင်းပြန် ကားခေါင်းခန်းမှာ ထိုင်ရမှ “ဆရာကြီး”လို့စိတ်မှာ

မှတ်ကြတာကိုးဗျ။

  @@@@@@@@@@@@ ##################$$$$$$$$$$$$$$$$^^^^^^^^^

တကယ်တမ်းတွေးကြည့်တော့လဲ အမြဲလဲမဟုတ် တကယ့် ကို ခဏလေး အချိန်ပိုင်းလေး

ပိုင်ဆိုင်ခွင့်ရတဲ့ နေရာလေးအပေါ်မှာ အရမ်းကို ခံစားလိုက်ကြတာကိုး။

နောက်ကျနော်တို့မြန်မာတွေ့ရဲ့ အတွင်းစိတ်ထဲမှာ ရှေ့မှာနေရမှ ဦးစားပေးခံရတယ်လို့

စိတ်ထဲမှာစွဲနေတာလဲ  ပါ ပါတယ်။

အဲတော့ ကိုယ့် ကို ရှေ့မှာမထားရင် အလိုလိုနေရင်းသိမ်ငယ်သွားသလို အနှိမ်ခံရတာလိုလို

ထင်မိသပေါ့နော်။

ကျနော်တို့ သုံးစွဲတဲ့စကားလုံးထဲမှာကိုက” ဦး”ဆိုတဲ့စကားကို ရှေ့တန်းတင်ထားတာကိုး။

အိမ်ဦးနတ် တို့ အိမ်ဦးခန်း တို့ အဦးဆုံးနေရာတို့ဆိုပြီး အလေးအမြတ်ထားခဲ့ကြတာကိုးဗျ။

ကဲ ဘာမဟုတ်တာတဲ့ နေရာလေးနဲ့ မောင်နှမတစ်တွေ နှစ်ပေါင်းများစွာ ဝေးကွာခဲ့ရတာကြာပေါ့။

ဒီတစ်ခါတော့ သူတို့ဘယ်နေရာထားထား ကျနော်ကတော့ ကျေနပ်စွာ နေမယ်လို့ ဆုံးဖြတ်ပြီးသားပါ။

ကျနော်တို့အသက်တွေလဲ မငယ်တော့ဘူးလေ။

နောင်အလွန်ဆုံး ဒီလိုဆုံနိုင်မယ် ဆုံခွင့်ရမယ်ဆိုရင်တောင် မင်းသားကြီး ကျော်ဟိန်းက

မင်းသားငယ် ကျော်သူကို ပြောသလောက်လက်ကလေးထောင်ပြသလောက် နှစ်အပိုင်းအခြားလောက်

နေရရင်ကံကောင်းပါဘဲ…………………………………………..။

 

ကိုပေါက်လက်ဆောင် အတွေးပါးပါးလေး

(21-1-2012)