ကိုယ့်အထုပ် ကိုယ့်အပိုး ကိုယ့်ဘာသာဆွဲ
(ကဲ…………..)
ငါတို့တွဲလက်တွေ ဖြုတ်ချိန်တန်ခဲ့ပြီ…။

လမ်းခွဲစကား ဆိုရအောင်လည်း
ငါတို့ရဲ့ ပက်သက်မှုက မဆိုသလောက်၊
(ဒါပေမယ့်…)
ငါ့အတွက် ကြီးကျယ်လွန်းခဲ့တာကနင်
ဒီရင်ခွင်……..ဒီနှလုံးသား
အားလုံး နင့်အရှေ့ အခစားဝင်ဖို့အသင့်
(နောက်ဆုံးအနေနဲ့ပါ…)
ငါနင့်ကို သတိရခွင့်ပြုပါ……။

ငါ့ရင်ဘတ်နဲ့ ပက်သက်တဲ့ အက္ခရာ
နင့် နာမည်လေး အရာထင်ကျန်ရစ်
ရင်နင့်အောင်မွှေးတဲ့ ပန်းကလေးတစ်ပွင့်
နင်ကိုယ်တိုင်ပျိုး    နင်ကိုယ်တိုင်ထိုး
နင်ကိုယ်တိုင်ချိုး    နင်ကိုယ်တိုင်ငြှိုးစေခဲ့..၊
နင့်အတွက် သက်သေမရှိတဲ့ အချစ်တစ်ခု
ငါ့နှလုံးသားထက်မှာ ကမ္ဗည်းထိုး
မျက်စိစုံမှတ်ခဲ့တဲ့ အရှုံးအတွက်
နင်ရက်စက်ချင် ရက်စက်
နင်ပက်သက်ချင် ပက်သက်
ကိုယ်ထိလက်ရောက်ဆိုတဲ့ အမှား
ငါ့ဘက်က ကျူးလွန်းခဲ့မိလို့လား
စဉ်းစားတိုင်း အဖြေမရတာအခက်သား..၊
တမင်သက်သက်တော့ မရက်စက်နဲ့
ဒီရင်ခွင်… ဒီနှလုံးသား
အပေါစားမဟုတ်ဘူး…။
(နင်သိလား)
ငါဘယ်လောက်အထိ ချစ်နေခဲ့ရလဲဆိုတာ
ပြုမိတဲ့ ကိစ္စတိုင်းမှာကိုက
နင့်ကို ချစ်တာတွေ……၊
အမှားတိုင်းကလည်း
နင့်ကို ချစ်လွန်းလို့…၊
မကျေနပ်သေးဘူးလား…?
ငါ့နှလုံးသားက အခစားဝင်ဖို့ အသင့်
(ငါတို့နှစ်ယောက်ဝေးသွားခဲ့ရင်သာ…)
ဒီကဗျာလေးနဲ့ နင့်ကို
ငါသတိရနေခွင့်ပြုပါ…..။   ။

ဇော်သက်ဦး