တစ်ဦးတည်းသော “ငါ”

တစ်ဦးတည်းသော ငါ

ဒဿနတွေ ခေါင်းထဲရိုက်သွင်း

စိတ်မိုက်တွေကို အမှောင်ချ

အဇ္ဇတ္တကို အရေခွံခွာပြီး

မျက်လုံးကိုဖွင့် နားစွင့်လိုက်တယ်

မိုးသောက် အာရုဏ်လင်းပြီပဲ

တစ်ဦးတည်းသော ငါ

နွားနို့နဲ့ကြုံရာ မနက်စာလုပ်

အမေဆင်တဲ့ Suit ကိုဝတ်

တစ်နေ့တာ အလုပ်တွေ

Plan ချလို့ ဟန်ပြရင်း

တက်ကြွတဲ့ ခြေလှမ်းတွေနဲ့

လုပ်ငန်းခွင်ထဲ တိုးဝင်လိုက်တယ်

ရောင်နီတွေတောင် လင်းပြီပဲ

တစ်ဦးတည်းသော ငါ

မနုဿဗေဒနဲ့ မဟာမိတ်ဖွဲ့

ပန်းတိုင်ဆီ မာရသွန်ပြေး

မတောက်တခေါက် မဟာဗျူဟာနဲ့

မရဲတရဲလုပ်ရင်းနဲ့ပဲ

တစ်နေ၀င် တစ်မိုးချုပ်ခဲ့တယ်

လမင်းရောင်ခြည် လင်းပြီပဲ

တစ်ဦးတည်းသောငါ

ဆေးဝါးနဲ့ကြုံရာ ညစာလုပ်

အမေပြင်တဲ့ အိပ်ယာထက်မှာ

နဖူးပေါ်လက်တင် စဉ်းစားရင်း

တစ်နေ့တာ အဘိဓာန်

ပြန်လှန်လှောလို့

ညကို နိဂုံးချုပ်လိုက်တယ်

တစ်ရက်သေဖို့ နီးပြီပဲ

In: ကဗျာ Posted By: Ariesprincess Date: Nov 12, 2010

Leave comment commentinfo