ကားတွေနဲ့လူတွေ ရှုပ်ရှက်ခတ်နေတတ်တဲ့မြို့

မေးခွန်းတစ်ခုအတွက် အဖြေတွေအများကြီးရှိနေတဲ့မြို့

လက်ကိုင်ဖုန်း နဲ့ကော်ဖီဆိုင် ယဉ်ကျေးမှုတွေ တွင်တွင်ကျယ်ကျယ် သုံးစွဲတတ်တဲ့မြို့

ပူလောင်မှုတွေနဲ့ အသားကျနေတဲ့ မျက်နှာတွေနဲ့ ရုန်းကန်နေကြတဲ့ ဘ၀အသီးသီးကို လက်ခံထားတဲ့မြို့

မျဉ်းကြားကဖြတ်ကူးနော်ဆိုတဲ့ သတိပေးသံတွေ ခဏခဏကြားကြားရတတ်တဲ့မြို့

ရုပ်ရှင်ရုံတွေမှာ လူပြည့်နေတတ်ပီး မီးပျက်ပြန်ပီဗျာ လို့ ခဏခဏ အသံကြားရတဲ့မြို့

ညဘက်ယဉ်ကျေးမှုမှာ လမ်းဘေးဈေးဆိုင်တန်းတွေနဲ့ ကြိတ်ကြိတ်တိုးလူတွေကြားထဲ ပျော်ချင်ယောင်ဆောင်နေတဲ့မြို့

တိုးတက်ပါတယ်ဆိုတဲ့နေရာမှာ မိုးထိအောင်တိုက်တွေမြင်နေရလဲ
တချို့နေရာတွေမှာ ရွာသာသာ သာ ရှိနေသေးတဲ့မြို့

ကုန်းကျော်တံတားတွေနဲ့ ပလာဇာတွေ ကားတွေနဲ့လူတွေ အသားတကျလှုပ်ရှားနေတဲ့မြို့ကြီး …

ဘယ်နေရာကြည့်ကြည့် ခိုအိမ်တွေနဲ့ ခင်ရာဆွေမျိုးဆိုတာတောင် မရှိတဲ့မြို့

အိမ်ပြန်ချိန်မှာ ညည်းညူသံတချို့ကို ကားမှတ်တိုင်မှာတောင် အမှတ်မထင်ကြားရတတ်တဲ့မြို့

တနေရာကနေတနေရာ သွားလာဖို့တောင် ကားတစ်စီးကိုမှ အားမကိုးတတ်ရင် မလွယ်တဲ့မြို့

သူ့ဟာသူတော့ အသားတကျပဲ ငါ့မှာသာ သူစိမ်းပြင်ပြင် ……..

ဟိဏ်းဇော်အောင်

In: ကဗျာ Posted By: hawzane Date: May 11, 2010  All Time