မာယာ

မာယာ
သံစဉ်တိုင်းနဲ့ ကခုန်သူ
ရင်ခွင်တိုင်းနှိုက် ပျော်မြူးသူ

မာယာ
နှင်းဆီလို ဆူးမရှိ
ခရေလို ပင်မမြင့်လို့
မဖြူစင်ရတဲ့ စံပယ်

မာယာ
ငှက်ချင်းအတူတူ
နေရောင်အောက်မှာ မပျံသန်းရတဲ့
ညဉ့်ငှက်ငယ်

မာယာ
သည်ကျွဲတွေကြောင့် ကြေမွရပြီး
သည်ကျွဲတွေရဲ့ အစားခံနေရတဲ့
မြေစာပင်

မာယာ
ဦးနှောက်နဲ့လည်း မရွေးချယ်
နှလုံးသားနဲ့လည်း မရွေးချယ်
သူ့ဘဝက
သွေးသားဈေးသည်

မာယာ
မီးရောင်ပြာပြာအောက်က
ပေါင်သားဖြူဖြူ
နှုတ်ခမ်းရဲရဲနဲ့
ကြောင်ပျိုမလေး

မာယာ
ရုန်းထွက်ပါတော့
မင်းရဲ့လက်တွေကိုဆုပ်ကိုင်
ဆွဲတင်မယ့်လူမရှိလည်း
မြေကြီးကိုထောက်ကန်
လူ့အားမာန်နဲ့ပေါ့…..

In: ကဗျာ Posted By: niaallin Date: Aug 6, 2013

Leave comment commentinfo