Professional Authors

ဆံပင်လုံးဝမညှပ်တဲ့နှစ်မှာ (၂၁)နှစ်ပြည့်တယ်

ဆေးတွေအချပ်လိုက်ကွာကျနေတဲ့ ‘ကွမ်းယာ’ဆိုတဲ့ ဆိုင်းဘုတ်ကလေးဟာ ကျွန်တော်နဲ့ အမြွှာပေါ့ ။

အဖေဟာ ထုံးပေါက်နေတဲ့လက်နဲ့ ကျွန်တော့်ကို ချီတယ်။

အမေဟာ ကွမ်းရိုးကလေးနဲ့ မျက်ခုံးမွေးဆွဲပေးတယ်။

တက္ကသိုလ်ကျောင်းသားတစ်ယောက်ရဲ့ ကွမ်းယာဆိုင်ကလေးကို ခင်ဗျားဘယ်လိုမြင်လဲ ။

သူလိုကိုယ်လိုပါပဲ။ ဘီးလုံးလေးတွေပါပေမယ့် တွန်းလို့ရွှေ့လို့မရဘူး ။

ကွမ်းရွက်ခြင်းအဟောင်းထဲ ၀င်ထိုင်ရင်း …

အဝေးပြေးကားကြီးတွေကို ငေးလိုက်

ယူကလစ်ပင်ကြီးတွေကို ကြည့်လိုက်

အဖေတီးတဲ့ ဂစ်တာလေးကို ပုတ်လိုက်

သတင်းစာတွေ ဆုတ်ဖြဲလိုက် နဲ့ … လောကကို ကုပ်တွယ်ခဲ့ ။

 

မစားရတဲ့ စပျစ်သီးချဉ်တယ်ပြောပြော၊ အခပေးကစားကွင်းကြီးတွေထက်အဖေ့ကဗျာစာရွက်တွေပေါ်မှာ ပုံတွေဆွဲရတာ နှစ်ခြိုက်သူပါ ။

ကျောင်းမှာ မသင်တဲ့စာတွေဖတ်၊ ကျောင်းမှာ မသင်တဲ့အတတ်တွေတတ်ကျောင်းမှာ မမြင်တဲ့ အမြင်တွေ မြင်လာတယ် ။

သေနတ်ပစ်တမ်း မကစားဘူး၊ ပန်းပွင့်လေးတွေ မခူးဘူး ၊ နိုင်ငံတော်သီချင်းကို ရဲရဲလိုက်မဆိုဘူး။

စာစီစာကုံးမကျက်ခဲ့တဲ့လူ ခုံပေါ်မတ်တပ်ရပ် ဆိုတဲ့စကားမှာကျွန်တော့်ဘ၀ရဲ့ ပထမဆုံးလက်သီးကျစ်ကျစ်ဆုပ်ခြင်းကို တတ်ကျွမ်းခဲ့ပေါ့ ။

 

အာကာသယာဉ်မှူးဖြစ်ချင်တဲ့ ကောင်လေးဟာ တစ်နေ့ကို မုန့်ဖိုးနှစ်ကျပ်ရတယ်။

(ပဲရေခဲချောင်းက တစ်ကျပ် ၊ ကံစမ်းမဲပါတဲ့ လျက်ဆားဘူးက တစ်ကျပ် )

နောက်တော့ ငါးကြိုးဂစ်တာရဲ့ B .. E .. A .. D .. G ဆိုတဲ့ကြိုးတွေကို

D .. R .. E .. A .. M လို့ ပြောင်းပြီး ညှိခဲ့ ။ စိတ်ကူးယဉ်အိပ်မက် ။

စိတ်မြန်လက်မြန်ယုံကြည်ချက်နဲ့ ပေသုံးထောင်ကျော်က ခုန်ဆင်းလာ … ။

ငှက်ပျောသီး(၃)လုံးနဲ့ ညတွေ ၊

ကျောင်းပွဲတစ်ပွဲတီး ရှမ်းထမင်းတစ်ပွဲနဲ့ နေ့တွေ ၊

အကုန်အကျသက်သာဖို့ (၅)နာရီမှ အိပ်ယာထတဲ့ ညနေတွေ ၊

ကမ္ဘာပေါ်မှာ ဘူတာကြီးတစ်ခုပဲ ကျောခင်းစရာရှိတော့တဲ့ သန်းခေါင်သန်းလွဲတွေ ၊

ပိုက်ဆံ (၅၀၀၀) အတွက် (၁၈)မိုင် လမ်းလျှောက်ရတဲ့ ရက်တွေ ၊

ဒါတွေဟာ ကျွန်တော်ဖျက်ပစ်ချင်တဲ့ ဖုန်းထဲက Call Log အဟောင်းတွေပေါ့ ။

 

ဘယ်ရုပ်ရှင်အရင်ကြည့်ရမှန်းမသိအောင် များလှတဲ့ ရုပ်ရှင်တွေ …

ဘယ်စာအုပ်အရင်ဖတ်ရမှန်းမသိအောင် များလှတဲ့ စာအုပ်တွေ …

ဘယ်သီချင်းအရင်နားထောင်ရမှန်းမသိအောင် များလှတဲ့ သီချင်းတွေ အတွက်တော့

အားလုံးကို ကျေးဇူးအထူးတင်ပါတယ် ။

ဘယ်ကလေးအရင်မွေးစားရမှန်းမသိအောင် များလှတဲ့ မိဘမဲ့တွေ …

ဘယ်သစ်ပင်အရင်ပျိုးရမှန်းမသိအောင် များလှတဲ့ လွင်တီးခေါင်တွေ …

ဘယ်လက်နက်အရင်ချခိုင်းရမှန်းမသိအောင် များလှတဲ့ စစ်ပွဲတွေ အတွက်တော့

အားလုံးကို ဒေါသထွက်ပါရစေ ။

 

ဆရာလှသန်းက စိတ်ရှည်ရှည်မထားနိုင်လို့ ဆံပင်ရှည်ရှည်ထားတာပါ တဲ့ ။

အခုကျွန်တော် (၂၁)ရန်မြောက် ဖိနပ်ကို စီးထားတယ် ။

ညအိပ်ဖူးတာ (၂၁)နေရာ မကဘူး ။

အရက် ၂ လုံး ၁ ပိုင်း ကုန်အောင်သောက်ဖူးတယ် ။

ခရီးထွက်ဖူးတာ မိုင်(၂၁၀၀) မကဘူး ။

နှစ်ယောက်တစ်အိပ်မက် မဖြစ်သေးဘူး ။

ရန်သူ (၂၁)ယောက် မရှိဘူး ။

တစ်ကိုယ်လုံးပေါင်းလို့ (၂၁၀၀၀)မပြည့်ဘူး ။

ဒါပေမယ့် …ဒီကဗျာကို နှစ်ခွက်တစ်ခွက်တင် ကျိုလိုက် ..

ဖျတ်ခနဲ ဖြစ်ဖြစ် ကျွန်တော့်ကို တွေ့ရှိရလိမ့်မယ် ။

တကယ်တော့ ….

ရှိစုမဲ့စု အနုပညာလေးကို

ညတိုင်းရှိခိုးပြီးမှ အိပ်တတ်တဲ့ကောင်ပါ ။

 

ဟိန်း

2:40 AM

25.10.2012

၂၁နှစ်ပြည့်မွေးနေ့

In: ကဗျာ Posted By: Date: Nov 13, 2012
Comment #1

အာကာသယာဉ်မှူး ဖြစ်ချင်တုန်းလား…

commentinfo By: SoFarAwayFromU at Nov 13, 2012
Comment #2

စကားလုံးရွေးချယ်ထားတာလေးတွေအရမ်းကောင်းတယ်ရှင့် နှစ်သက်မိပါတယ်

commentinfo By: maypyo22889 at Nov 13, 2012
Comment #3

အရေးအသားများ အားကျမိပါ၏။ ကဗျာကောင်းတစ်ပုဒ် ဖတ်ရတဲ့အတွက်ကျေးဇူးပါ ကိုဟိန်း…..

commentinfo By: moezat at Nov 13, 2012
Comment #4

myat lone hte hmar paw lwin myin yaung lar par ei

commentinfo By: ei lay at Nov 14, 2012
Comment #5

ဒါဆို သေချာသွားပြီးဗျာ။ နှစ် တစ် ပဲ မွေးထိုးတော့မယ် ။ ကံမကောင်းရင်တော့ နှစ် တစ် လက်မတုတ်နဲ့ အရိုက်ခံ ရမှာပေါ့ ။ ဟီး ။ အာကာသယာဉ်မူး ဖြစ်ချင်ရင်တော့ အာကာသဆိုတဲ့ ဆိုင်လေးရှိတယ်။ အဲ့ဒီမှာသွားသောက်ဗျာ။
ခင်တဲ့
မိုးသစ် (ခ) မိုးလူ

commentinfo By: Moe Thit at Nov 14, 2012

Leave Comments

Name*

Email*
Website
Email me whenever there is new comment