ကျွန်တော်ဟာ …
အရိုင်းအစိုင်းတစ်ကောင်ပါ
လူကြီးမင်းတို့ရဲ့ လောကထုံးတမ်းနဲ့
ကြည့်မယ်ဆိုရင်ပေါ့လေ

နက်ကတိုင်ဝတ်ရမှာထက်
စွပ်ကျယ်စုတ်တထည်ကို
ပိုသဘောကျတယ်
အဆင့်မရှိဘူးလို့တော့မပြောနဲ့ပေါ့ဗျာ
ကျွန်တော်က ချိုင့်တလုံးမှမဟုတ်တာ

သွားမတိုက်တာနဲ့ပဲ
ညစ်ပတ်တယ်တဲ့လား
ဒါပေမယ့် ..ဘယ်လိုလုပ်မလဲ
အလိမ်အညာတွေ မပြောတတ်တဲ့
ကိုယ့်ခံတွင်းကိုယ် သတီနေတော့လည်း

တွေးတတ်တဲ့ ဦးနှောက်တလုံး
အမေက လက်ဆောင်ပေးခဲ့တော့လည်း
ကိုယ့်ရပ်တည်ချက်နဲ့ ကိုယ်
ခင်ဗျားလုပ်သမျှတော့
‘ဟုတ်ကဲ့’ ဘယ်ပြောနိုင်မလဲ

ဟန်ဆောင်အပြုံးတွေ
မပြုံးခိုင်းပါနဲ့ဗျာ
အဲဒီအပြုံးတွေ လက်ခံဖို့တောင်
ပျင်းလွန်းလို့ .. အရည်ပျော်ကျနေတာ
ရပ်ကွက်ထဲမှာ
နွေခေါင်ခေါင်ကြီး ရေကြီးနေလေရဲ့ ။ ။

အရဲ

In: ကဗျာ Posted By: ahye Date: May 30, 2009  All Time